.

यु ए ई मा घरमा काम गर्न जान अब बाटो खुल्यो

घरेलु कामदारका रुपमा युएई आउने वैधानिक बाटो खुल्ला भएको छ । युएईको आबुधाबीमा रहेको नेपाली दूतावासले घरेलु कामदार सम्बन्धी काम गर्ने स्थानीय १० एजेन्सीलाई नेपालबाट घरेलु कामदार ल्याउन अनुमती दिएपछि वैधानिक बाटो खुलेको हो ।प्रक्रिया पूरा गरेर दूतावासमा सूचिकृत १० वटा एजेन्सीले मात्र नेपालमा घरेलु कामदार पठाउन मान्यता पाएका ४९ वटा म्यानपावर मार्फत युएईमा कामदार ल्याउन पाउने छन । वैदेशिक रोजगारमा घरेलु कामदार पठाउने सम्बन्धी बनाइएको निर्देशिका २०७२ लाई संशोधन गरी २०७३ वैशाख २१ गतेबाट लागु गर्न सरकारले दूतावासहरुलाई परिपत्र गरेको थियो ।

सरकारले निर्देशन गरे लगत्तै दूतावासले झन्डै तीन महिना लगाएर कार्यान्वयनमा ल्याएको हो । सरकारले व्यवस्थित प्रावधानसहित कोटा प्रमाणीकरण प्रणाली ल्याएर महिला तथा पुरुषलाई घरेलु कामदारका रुपमा युएईलगायतका देशमा पठाउने व्यवस्था ल्याएपछि कार्यान्वयनका लागि दूतावासले तीन महिना अघिदेखि काम थालेको थियो । एजेन्सी दर्ता गरेर सबै प्रक्रिया पूरा गरेकाले मंगलबारदेखी घरेलु कामदार मागपत्र दूतावासले प्रमाणीकरण गर्न सुरु गरेको दुतावासले जनाएको छ । दूतावासमा सूचिकृत हुन प्रत्येक एजेन्सीले ३७ हजार दिरहाम अर्थात झण्डै १० लाख रुपैयाँ धरौटी जम्मा गरेका छन । त्यस्तै दूतावासमा सूचिकृत गर्दा दुई हजार दिरहाम दर्ता शुल्क समेत एजेन्सीहरुले बुझाएका छन् ।

दूतावासले गएको जेठ अन्तिम हप्ता सूचना जारी गर्दै एजेन्सीहरुलाई आवेदन दिन आग्रह गरेको थियो । त्यसरी आवेदन दिएका एजेन्सीहरु मध्ये १४ एजेन्सी छनौटमा परेका थिए । अन्य प्रक्रिया पूरा गरेका छनौटमा परेका १४ मध्ये १० एजेन्सीले मात्रै दूतावासमा धरौटी रकम जम्मा गरेकाले रकम जम्मा नगरेका एजेन्सीले तत्काल घरेलु कामदार ल्याउन पाउने छैनन् । छनौटमा परेका एजेन्सीमध्ये सात वटा आबुधाबी, दुई वटा अजमान र एउटा अलऐनमा रहेका छन ।  

एजेन्सी छनौटका लागि दूतावासले स्थलगत अनुगमन तथा एजेन्सीले कामकाजबारे अध्ययन गरेर अनुमती दिइएको दूतावासका कार्यबाहक राजदूत नेत्र बहादुर टण्डनले बताउनुभयो । सूचिकृत एजेन्सीको समयावधी सन् २०१७ सम्म रहने र नेपाल सरकारको निर्देशिका तथा स्थानीय कानुन अनुसार उनीहरुले नेपालबाट घरेलु कामदार ल्याउन पाउने टण्डनले जानकारी दिनुभयो ।

निर्देशिकाले तोकेको मापदण्ड र व्यवस्था अनुरुप घरेलु कामदार युएई आए समस्या नपर्ने र समस्यामा पर्नेलाई एजेन्सीले दूतावासमा जमानत राखेको रकमबाट कामदरलाई सहयोग गर्न सकिने टण्डनको भनाइ छ । यसअघि दूतावासको शरणमा आउने महिला अवैधानिक बाटो भएर हाउसमेडका रुपमा युएई आउने गरेको पाइएको थियो । नयाँ व्यवस्था अनुसार महिला पुरुष दुवै घरेलु कामदारका रुपमा आउन पाउने छन् ।
उमाकान्त पाण्डे - उज्यालो बाट 
Loading...
Share on Google Plus